| 久別了o既阿沈,令我重覓消失佐o既光景,人生有好多無奈,不過,我依然要找尋另一種生活o既快樂。 我想起le年3度廣西o既旅程,遇到o既人同事,都成為我o既寄託。 我坐上六叔親手整o既木船,划到江o既對岸。我拖住孫兒o既小手,肩並肩o係江邊漫步,旁邊係石仔同竹樹,唔知le個係咪六叔一直都留戀揚美古鎮o既原因呢?我仲未兌現到我o既承諾,或者有一日,我會親自送到你一直居住o個艘船上。 一直想寄盒曲奇比楊薇,雖然我覺得你係太早結婚,不過當我挽住你行街飲野,同你影貼紙相,甚至一齊高談闊論愛情o既時候,你好似我家姐。雖然刮大風,去唔到斜陽島,但你同三叔就帶我去食海鮮,我自己o係島上行佐一陣。認識到你地,我覺得不枉此行。離開潿洲島時,我塞佐少少錢比奶奶,奶奶雖然唔多講野,但餐餐都叫我食多d。我握住奶奶雙手同佢道別,佢叫我下年要帶爸爸媽媽返黎玩,我始終冇同佢地講,其實我真係聽唔明佢地d普通話口音。 令我最著迷o既係陽朔西街o既酒吧,因為唔少bar老闆都係香港人,香港人黎到總會多份親切感。樂隊會唱華仔,會唱王力宏,會唱green day。 忽然,我好掛住伯伯o既龍鬚麵,幼如髮絲o既麵條,食落肚唔只係爽甜o既味道,仲有伯伯對食物o既執著。 好掛住西街o既人,酒吧,美食,所有所有.....我有個念頭,我想下星期返去渡假!! |
